حلم الجمال والشباب الدائم حلم قديم قدم الإنسان نفسه، ومحاربة الشيخوخة ومقاومة تأثيرات الزمن معارك خاضها الإنسان من بداية تاريخه، تنوعت أدواته حسب المتاح في بيئته لكنه كان ولا زال باحث عن الجمال ومقاومة تأثيرات الزمن والطبيعة السلبية، من الاف السنين استخدم المصريين القدماء زيت الزيتون وبيض النعام والعجين والعسل واللبن والرمل وخلاصة الصبار وغيرها مع الاحتجاب من الشمس والتراب والحشرات كعوامل حفاظ علي جمال البشرة. ومع المدنية الحديثة دخلت الإكتشافات العلمية والمستحضرات الصناعية سوق التجميل وامتدت من الدهانات والمستحضرات الموضعية إلي إجراءات زي حقن مواد معينة زي البوتكس والفيلر ووضع حشوات زي حشوات السيليكون وغيرها لبناء المناطق الضامرة وأجهزة طبية وغيرها ممكن يستخدم في المنزل، وتوسع مجال مستلزمات التجميل بقدر توسع حلم الإنسان المعاصر وتطلعاته للجمال وخوفه من الشيخوخة والزمن، وأصبح لكل اجراء مزاياه وعيوبه ومخاطره، وفي تمانينات القرن العشرين ظهر حقن الدهون الذاتية كثورة في مجال التجميل واستعادة الشباب وتطورت أساليبه وتقنياته وأدواته مع تحسن كبير في نتايجه.
– إيه أهمية الدهون للوجه وعلاقتها بمظاهر الشيخوخة؟
– مع تقدم السن تفقد أنسجة الوجه وخصوصا الدهون جزء من حجمها ويفقد الوجه مظهره الشبابي المتألق وتظهر التجاعيد والترهلات وتبرز عظام الوجه كملمح أساسي من ملامح التقدم في العمر.
– إيه أهم أسباب فقدان دهون الوجه؟
– التغيرات الهرمونية مع تقدم العمر ومع بعض الإمراض وبعض الأدوية ومع النحافة ممكن تتسبب في فقدان دهون الوجه خصوصا في منطقة الخدود وحول العين. وأيضا العوامل البيئية المحيطة زي التلوث والتدخين والتعرض لأشعة الشمس فوق البنفسجية والتوتر وغيرها من العوامل اللي بتكسر ألياف البشرة وتغير تركيبة وترتيب دهون الوجه وتراكمها اسفل الوجه وفي الرقبة. ومؤخراً أصبحت جراحات السمنة وأنظمة الدايت القاسية من اسباب فقدان دهون الوجه الأساسية.
– ايه المقصود بحقن الدهون الذاتية؟
– نقل دهون من الشخص نفسه من مناطق تراكم الدهون (المنطقة المانحة) زي البطن والأرداف والفخذين ومعالجتها وتنقيتها وإعادة حقنها للأماكن النحيفة المطلوب تسمينها أو تكبيرها زي الوجه والكفين والثدي من خلال إبر حقن دهون خاصة تناسب مكان الحقن ودا تدخل طبي بيتم في غرفة عمليات مجهزة لضمان معايير الأمان ومكافحة العدوي.
– عملية حقن الدهون بتتم ببنج موضعي ولا بنج كلي؟
– ممكن تتم تحت تأثير البنج الموضعي مع بعض الأدوية المهدئة في الوريد أو البنج الكلي بناء على ظروف كل حالة وكمية الدهون المطلوب حقنها وقرار الطبيب المعالج.
– النتيجة اللي بتتشاف بعد الحقن مباشرة هل هي النتيجة النهائية؟
– النتيجة اللي بتتشاف بعد الخروج من غرفة العمليات بتتكون من جزئين الأول هو الدهون اللي تم حقنها والتاني هو التورم، والتورم رد فعل طبيعي للتدخل الطبي وتعامل ابر حقن الدهون مع أنسجة الجسم وبيكون بشكل أساسي في الأسبوع الأول بعد الحقن ويخف بشكل تدريجي الي ان يختفي خلال أسابيع. بعد اختفاء التورم تتبقي الدهون اللي تم حقنها ودي في العادة يعيش منها ٦٠-٧٠ بالمائة والباقي يمتصه الجسم خلال الست شهور الأولي بعد الحقن، وتتفاوت نسبة الدهون الممتصة عند بعض الناس حسب عوامل كتير لكن الجزء المتبقي من الدهون بعد ٦ شهور من عملية الحقن يصبح جزء من نسيج المنطقة ويستمر بشكل دائم.
– ايه اللي متوقع يحصل بعد العملية وإيه أهم الإحتياطات والتنبيهات؟
– لازم اللي خضع لعملية حقن دهون يكون فاهم كويس إن التورم بيزيد بشكل واضح خلال الأيام الأولي بعد العملية وبعد كدة يبتدي يقل ويختفي علي مدار الأسابيع القليلة بعد العملية، ودا مهم جدا علشان مينزعجش لو لاحظ زيادة في التورم في خلال الأيام الأولي بعد العملية؟ ولازم المريض ياخد الأدوية زي ما هي موصوفة من الطبيب وللمدد المحددة وما ياخدش أي أدوية تانية بدون مراجعة الطبيب وحتي لو كان بياخد أدوية معينة قبل العملية زي الأدوية اللي بتزود سيولة الدم (زي البروفين والأسبرين) اللي لازم يتم ايقافها قبل العملية بفترة كافية. والتدخين كمان تأثيره سلبي جدا علي خلايا الدهون اللي تم حقنها علشان كدة لازم يتم وقف التدخين علي الأقل ٦ أسابيع قبل العملية و ٦ أسابيع بعدها لزيادة فرصة التغذية الدموية السليمة للخلايا الدهنية الجديدة وفرص انها تكمل.
– فيه تنبيهات معينة بخصوص الأكل والتغذية بعد العملية؟
– شرب المية بكميات كافية، والأكل بيبدا بعد العملية بالأطعمة اللينة زي الشوربة والعصير في أول يوم وبالتدريج الأكل العادي حسب التقبل، ويفضل تقليل الملح في الأكل لأن الملح ممكن يزود احتفاظ الجسم بالمية وبالتالي التورم.
– ممارسة الرياضة بعد عملية حقن الدهون الذاتية؟
– تجنب ممارسة الرياضة الشاقة أول شهرين بعد العملية، وينصح بالرياضات الخفيفة زي المشي، وفي كل الأحوال تجنب الضغط علي اماكن حقن الدهون بما في ذلك النوم علي مناطق الحقن.
– هل حقن الدهون بيعمل شد للوجه؟
– فكرة حقن الدهون الأساسية استعادة الشكل الجذاب وامتلاء الوجه ودا بيكون معاه درجة معينة من درجات رفع وشد الوجه، لكن حقن الدهون مش حل للترهلات الشديدة في الوجه والرقبة اللي بيكون حلها الأفضل عمليات الشد الجراحي وبتقدر في نقاشك مع الطبيب اثناء زيارتك له تقرر ما هو أنسب لطبيعة مشكلتك.
– بنسمع كتير مصطلح الخلايا الجذعية في الكلام عن الدهون، ممكن حضرتك تدينا فكرة عن ايه هي الخلايا الجذعية؟
– الخلايا الجذعية هي خلايا من نوع خاص تمتلك القدرة المذهلة على التطور إلي خلايا وأنسجة مختلفة علشان تحل محل أو تصلح الخلايا التالفة في الجسم بطريقة ذاتية آمنة للجسم وخالية من الأعراض الجانبية.
– وفيه كمان عوامل النمو دي عبارة عن ايه وبتعمل ايه؟
– عوامل النمو او ال growth factors من الحاجات اللي بتتواجد بشكل كبير في الدهون الذاتية ودي بروتينات وهرمونات ستيرويدية بتحفز انقسام الخلايا ونموها وتكاثرها والتآم الجروح وتجديد الخلايا التالفة وتحفيز تكوين الكولاجين وأصبح لها دور كبير ومهم في اجراءات استعادة الشباب وازالة مظاهر الشيخوخة.
–
إيه الفرق بين حقن الدهون والفيلر؟
– حقن الدهون بيوفر إطلالة طبيعية بملمس طبيعي والخلايا الجزعية وعوامل النمو الموجودة في الدهون بتساعد في إضفاء حيوية ونضارة للبشرة بالإضافة للإمتلاء. حقن الفيلر آمن بشكل نسبي للغالبية اللي بتستخدمه لكن احتمالات المضاعفات زي التحسس ورفض الجسم للفيلر لازالت موجودة لكون الفيلر مادة غريبة عن الجسم في حين ان الدهون آمنة وخالية من النوع ده من المضاعفات بسبب كونها نسيج ذاتي. نسبة من الدهون اللي بيتم حقنها ممكن يفقدها الجسم في خلال اول ٦ شهور لكن المتبقي بعد ال ٦ شهور بيستمر بشكل دائم في حين ان الفيلر يحتاج الحقن بشكل مستمر كل ست شهور إلي سنة. وميزة من مزايا الدهون الذاتية هو اتاحة حقن كميات كبيرة ومناطق متعددة في نفس العملية مع انخفاض التكلفة العامة للحقن مقارنة بالكمية. لكن الفيلر يظل اختيار للراغبين في حل مؤقت لامتلاء بسيط بدون الدخول لغرفة العمليات.
– ايه دور حقن الدهون في الندبات؟
– حقن الدهون له دور مميز في علاج الندبات الناتجة من الحروق أو التشوهات في الوجه والجسم وتحسين مظهر ندبات حب الشباب والندبات العميقة والغائرة، يساعد علي تحسين شكل الجروح والندبات وجودة وملمس ولون الجلد. وحقن الدهون له دور كبير في علاج الضمور المصاحب للتشوهات الخلقية للوجه.
__________
بطاقة تعارف كاتب المقال..من هو الدكتور كرم علام؟
هو أستاذ بكلية الطب بجامعة سوهاج ويعد واحد من أهم رواد جراحة التجميل والحروق والوجه والفكين، .استشاري جراحات تجميل الأطفال و الاختلافات التكوينية للوجه والجمجمة دكتوراة وزمالة جامعة كاليفورنيا لوس أنجلوس – أمريكا زمالة جامعة ميونخ – ألمانيا
هو صاحب المبادرة الانسانية العظيمة “ما تخبيش وشك” لعلاج تشوهات الأطفال بالمجان.
كما يتمتع الدكتور كرم علام بقدر عال من الثقافة العامة والعلمية ومحبة الجميع.
