علاء عبد الحسيب يكتب : زمن الأقزام
“محامي” طلع امبارح أعلن تبنيه الدفاع عن زوج بيتهم مراته بالزنا مع قيادة كروية في اتحاد الكورة .. كان مبسوط جدا وهو بيشوف التريند بيكبر دقيقة بعد دقيقة .. وثانية بعد ثانية .. تريند “الفضيحة” .. رغم إنه كان قادر يتقدم ببلاغه بدون دوشه .. !
اللي اتفرج على فيديو “المحامي” وهو بيتكلم مع الزوج في بث مباشر .. وبيقرره علشان يذكر “صوت وصورة” اسم مراته في الفيديو وقدام كل الناس .. وكمان وهو بيوجه اتهامه ضد القيادة الكروية المتهم في الواقعة .. ها يعرف كويس جدا إنه هو عايز يفجر قضية “الفضيحة” .. ويصدرها للناس !
النهاردة في فيديو جديد .. المحامي طلع يعلن انسحابه من القضية .. ليه ؟ .. لأنه اكتشف إن الزوج مقدم في مراته بلاغ من ٦ شهور .. والزوجة محبوسة من فترة في قضية ابتزاز “جنسي” .. مش دي الإشكالية برضه لغاية دلوقتي .. !
الإشكالية إن المحامي في الفيديو طلع النهاردة يقول أيه : أنه بيعلن انسحابه من القضية لأن موكله “الزوج” خدعه وما صارحوش بحقيقة حبس الزوجة .. وإنه كمحامي – لمؤاخذة- محترم قرر ينسحب علشان ما يبقاش بيشارك في نشر الفضايح ..
كنت بستغرب زمان .. لما بشوف صحفيين كبار مابيهتموش بقضايا الأعراض ولا بيحطوا أسمائهم على موضوعات “وحشة” وإن كانت حصلت .. أو لما بسمع أن المحامين الكبار “الكبار حجم وقيمة وعلم” لما حد بيروحلهم بقضية مخلة بالشرف بيطردوه ..! .. دلوقتي بس عرفت إننا في زمن الأقزام .. والله زمن الأقزام ..! ..
___________
من هو الكاتب
هو الكاتب الصحفى علاء عبد الحسيب، من مواليد محافظة سوهاج، ويعد من انشط وابرز شباب الصحفين وأحد نجوم موسسة الاهرام العريقة. له الكثير من الموضوعات المتميزة والعديد من المقالات الهامة المنشورة فى المواقع والصحف.
ويعد عبد الحسيب من الشباب الغيور على مهنته مما دفعه لتدشين حملة “مش صحفى ” مع عدد من زملاءه لمحاربة منتحلى الصفة ومواقع بير السلم.
