حربى عبد الهادى يكتب : الدنيا حق إنتفاع

الدنيا بكل اللي فيها حق انتفاع مفيش حد يملك فيها أي حاجة، بالتأكيد معاك ورق ملكية لكل حاجة عندك .. صح ؟ شقتك … أرضك .. عربيتك .. حسابك في البنك ، وغيره وغيره.

لكن تعالى نفكر : نفس الشقة اللي إنت فيها .. سواءً كانت بإسمك أو بإسم والدك .. بعد كام سنة (ربنا يطول في عمرك) راح تبقى بإسم حد من أولادك .. صح !!
يبقي انت كنت عايش فيها حق إنتفاع وبس لغاية ما تخلص رسالتك وبعدين تسيبها للي بعدك زي ما سابها لك اللي قبلك، والدنيا كلها بتلف كده على الكل.
الغريب إننا بنتخانق ونكره ، ويمكن نقتل بعض على حاجات ربنا مسلفها لنا نقضي بيها كام يوم وبس.
مفيش ملكية حقيقية في الدنيا، مجرد ملكية وهمية. زي غرفة الفندق تبقى بتاعتك يومين الإيجار وبعدين ترجع لأصحابها، أو كرسي الطيارة أو القطار أو التاكسي يبقى بتاعك كام ساعة لغاية لما الرحلة تخلص وييجي اللي بعدك ياخده !!
لو فهمت كده هتعمل حاجات كتير حلوة.

هاتنبسط باللي عندك وتعمل بيه حاجات حلوة تفرح بيها مع كل حبايبك.

إقتصاد وحوش بحكمة ، لكن إوعى تبخل على نفسك وعلى اللي معاك.

كمان هتبطل تتخانق وتضيع وقتك على حاجات تتحل بشوية تفاهم.

اخسر فلوس بس ما تخسرش راحة بالك ، واوعى تضيع عمرك على حاجات هي في الآخر مش ملكك.
إسعد اللي حواليك و خليهم يفرحوا .. افتكر إن كتير من اللي حوشناه يا رميناه .. يا نسينا إنه عندنا .. يا تلف وعت وباظ من الركنة. كده هاتفرق معاك وتكتَّر من خيرك علشان قلبك يعيش مرتاح
٠٠٠فالخلاصة ٠٠٠
الدنيا حق انتفاع !!! الدنيا مجرد محطة

____________

من هو الكاتب

هو الأستاذ والكاتب الصحفى الكبير الأستاذ حربى عبد الهادى بلوم، نائب رئيس تحرير جريدة الجمهورية وأحدى أبرز الصحفين النقابيين والكتاب بمحافظة سوهاج  تخرج من كلية الشريعة والقانون، ثم التحق بالعمل الصحفى، وله تاريخ صحفى مشرف وحافل بالنجاحات، وهو أحد رموز عائلة بلوم الشهيرة بمدينة المنشاة.